07/01/2010

Presentación do II Trofeo Raíñas Meigas Concello de Burela

Presentación do II Trofeo Raíñas Meigas Concello de Burela

O CD Burela FS presentou esta tarde, no salón de plenos do consistorio burelao, o II Trofeo Raíñas Meigas Concello de Burela de Fútbol Sala Feminino. Coa colaboración da Delegación de Deportes municipal e o patrocinio da Área de Deportes da Deputación de Lugo, o club laranxa ofrecerá nesta cita, o 10 de xaneiro, un duelo da División de Honra, entre o Burela FS Feminino Pescados Rubén e o Valladolid FSF.


O acto contou coa presenza do delegado da Área de Deportes da Deputación de Lugo, Antón Veiga, e a concelleira de Deportes, Neves Cando, xunto aos directivos da entidade burelista, Auditor Rodríguez e Antonio Couto.


Antón Veiga felicitou o labor do CD Burela FS en prol do fútbol sala e reafirmou o seu compromiso co proxecto laranxa: “O fútbol sala, que ten en Burela un referente consolidado, é unha das apostas nas que dende a Deputación de Lugo se está traballando, dentro do apoio progresivo que vimos prestando e seguiremos prestando ao deporte mariñán”. Neste senso, Neves Cando cualificou o Raíñas Meigas “como un referente no fútbol sala feminino e animou a toda a afección a acudir á cita, para repetir o éxito da primeira edición”.


Pola súa banda, Antonio Couto agradeceu tanto ao Concello coma á Deputación a axuda que ambas as administracións veñen brindando a todo o proxecto burelao, “sen a cal o CD Burela FS non podería chegar a unha estrutura con preto de 200 rapaces/as nas categorías inferiores, un equipo en Prata e outro en Honra, equiparable aos clubs máis sólidos de España”. O directivo burelista tamén incidiu no esforzo da entidade mariñá pola mellora continua desta cita: “Despois do triangular autonómico da primeira edición, co Cidade das Burgas e A Fervenza, este ano o Raíñas Meigas acolle un duelo nacional; ademais estamos traballando para que en edicións sucesivas poida chegar a alcanzar carácter internacional”.


A batalla Burela FSF-Valladolid FSF do II Trofeo Raíñas Meigas arrancará ás 12.00 horas do domingo, con acceso gratuíto para os socios/as do club e menores de 18 anos; o prezo da entrada para os adultos/as non socios/as será de 3 euros.


Selección Galega. A capitá laranxa, Claudia, non participará no encontro ante as valisoletanas, debido á súa convocatoria coa Selección Galega Absoluta para a fase previa do nacional, que terá lugar entre o 8 e o 10 de xaneiro en Ourense. O sábado, ás 12.00 horas, Galicia enfrontarase ao perdedor de Madrid-Cantabria e o domingo, tamén pola mañá, tocaralle medirse ao vencedor do antedito partido. 

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.