O Burela FSF perde en Elxe pero quédalle a opción de Vista Alegre para inscribirse na Copa de España

O Burela FSF Pescados Rubén mantívose fiel ao seu estilo a pesar de perder na súa visita ao todopoderoso Femesala Elxe, que venceu por 4-2. O duelo entre ambos os conxuntos respondeu ás expectativas esperadas xa que as dúas escuadras ofreceron unha gran tarde de fútbol sala.

O inicio do encontro foi trepidante por parte das ilicitanas que asediaron a meta defendida por Jozi, que fixo o seu debut oficial co cadro mariñán. A meta brasileira foi protagonista nesta fase xa que mantivo o seu equipo ante o acoso local, aínda que Lidia puido inclinar a balanza ao lado laranxa nun man a man que desbaratou Sonia. Co paso dos minutos o Femesala baixou a súa sensación de perigo aínda que mantiña o control do xogo.

O Burela non lograba conectar o último pase que lle permitise ameazar a meta local. A igualdade no marcador mantívose ata que o Femesala soltou dúas poutadas, minuto 17 e 18, ao aproveitar dous roubos en media pista e finalizar perfectamente ambas as contras. Noelia foi a designada en ambas as ocasións para bater a Jozi.

Con 2-0 chegouse ao descanso, que deu paso a unha segunda parte moi diferente. As burelás mostraron o seu potencial e comezaron a dominar a un Femesala atónito ante o xogo e as ocasións laranxas. Unha vez máis, Lucía comandou a reacción burelá e puxo o 2-1, minuto 25, ao marcar un lanzamento de falta. Dous balóns á madeira e as continuas chegadas mariñás presaxiaban unha remontada que se viu cortada coa definición de Laura, que estableceu o 3-1, minuto 28. Este tanto aliviou o apuro local e o choque entrou nun capítulo diferente que aproveitou o Femesala para marcar o 4-1. O conxunto burelao non tirou a toalla e buscou a opción de porteira-xogadora a sete minutos do final; Souza logrou recortar a distancia co 4-2 e aínda que o Burela gozou de máis oportunidades o marcador permaneceu inamovible.

PRÓXIMA XORNADA. A pesar da derrota en Elxe, a escuadra dirixida por Javier Pardeiro depende unicamente de si mesma para entrar, de novo, na historia laranxa. Vista Alegre ditará sentenza para a aventura da Copa de España 2010. O Burela FSF Pescados Rubén xoga todo a unha carta. O rival nesta contenda, o Valladolid. O escenario para a partida, a 'Bomboneira Laranxa'. O conxunto burelao ten as cartas necesarias para imporse neste duelo, pero tamén debe contar cun repóker de ases, non na manga senón na bancada de Vista Alegre.