06/02/2010

Dani Martín sela a remontada laranxa no último segundo

Dani Martín sela a remontada laranxa no último segundo

Dani Martín fixo vibrar o Vista Alegre tras marcar, no último segundo, o tanto da vitoria (4-3) fronte a un Cámping El Escorial incrédulo ante a remontada laranxa. A acción decisiva do encontro, moi protestada polos madrileños, determinou un choque no que os visitantes seguiron á perfección o seu guión, defensa numantina e contragolpes perigosos, mentres que o Burela FS tivo na súa escasa definición unha rémora que arrastrou durante os corenta minutos.


A pesar diso, os tres puntos quedaron nun Vista Alegre que aumentaba os decibeis segundo avanzaba un choque que comezou con sorpresa para os locais. Os madrileños cobraron unha renda de 0-2, tras senllos contragolpes nos que Amrani foi o protagonista. Finalizou o contragolpe que supuxo o 0-1 (minuto 8) e asistiu a Cogorro que situou o 0-2 no minuto 10. A reacción laranxa non se fixo esperar e Purao disparou desviado un balón franco na frontal da área visitante. Edu salvou o 0-3 e Orol desperdiciou unha grande ocasión tras unha xogada de estratexia nun córner.


A partir de aí, secuencia de ocasións locais; Juanma lanza fóra por pouco, Javi Rodríguez tira ao pau e o seu rexeitamento aprovéitao Dani Martín que se topa co traveseiro, Revilla tampouco consegue bater a Toño Calvo. Pero a 30 segundos do descanso, Juanma establece o 1-2 tras unha gran xogada de Javi Rodríguez.


Na continuación repítese o guión e o El Escorial aumenta a súa vantaxe cun tanto de Orol, aínda que Minu responde para situar o 2-3. As poutadas visitantes comezaron a escasear e o Burela comezaba o seu asedio infrutuoso. André, Javi Rodríguez, Minu e Dani Martín, en varias ocasións, rozaban o tanto do empate que non aparecía. Entón chegou o minuto 34, Josito realiza unha falta, desproporcionada e perigosa, sobre Javi Rodríguez, o que provoca as protestas locais. Resultado, expulsión de Purao e do visitante Mejías. Ambos os conxuntos xogan con un menos e o marcador permanece impasible.


Tras o regreso á normalidade, o Burela aposta polo porteiro-xogador e Minu logra o empate que aviva a bancada laranxa. A falta de dous minutos para o final, os de Suso Rey manteñen, acompañados polos cánticos da afección, a ambición pola vitoria que chegou no último suspiro por mediación de Dani Martín.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.