27/07/2010

O Club Ribadeo FS e o Burela FS estreitan lazos na potenciación da base feminina

O Club Ribadeo FS e o Burela FS estreitan lazos na potenciación da base feminina

O Club Ribadeo FS e o CD Burela FS dan un paso máis na potenciación da base feminina estreitando os seus lazos a través dun convenio de colaboración de cara a 2010-11. O presidente da entidade ribadense, José Francisco Martínez Rodríguez, achegouse na tarde de onte ata as oficinas laranxas para formalizar o devandito acordo co máximo responsable do CD Burela FS, José Ramón González Casas.


O presidente burelista destacou a relevancia da colaboración coa entidade ribadense “na aposta por consolidar a práctica de actividade física e impulsar o deporte de base feminino na comarca da Mariña”. José Francisco Martínez tamén incidiu nos beneficios deste achegamento: “Para as nosas xogadoras é unha ilusión compartir xornadas cun equipo de referencia na máxima categoría; neste proxecto a longo prazo, as rapazas poden comprobar moi de preto que as portas do fútbol sala feminino da Mariña están abertas ata a elite e isto convértese no maior aliciente para as deportistas da base”.


No devandito marco de actuación, as xogadoras e o profesorado do Club Ribadeo FS poderán gozar de xornadas de convivencia e amigables cos membros do CD Burela FS, ademais de recibir pases especiais para presenciar os encontros laranxas e acceder a tarifas especiais nas actividades programadas dende o club. A entidade burelista tamén lles brindará a súa infraestrutura a todas aquelas rapazas que non poidan continuar coa práctica do fútbol sala por inexistencia de categorías adecuadas no seu club.


Os inicios do Club Ribadeo FS remóntanse a 1998 como un sólido xerme do fútbol sala feminino na Mariña, coa creación dun conxunto sénior en Primeira B e o traballo temperán coa escola deportiva municipal. En 2010-11 e con preto dunha trintena de xogadoras, a entidade sairá cun equipo sénior en Autonómica, que logrou o ascenso despois de acadar a segunda posición en Provincial 2009-10, e dous conxuntos nas competicións de base, alevín e cadete.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.