O Burela vence con solvencia o Brihuega e medirase ao Gáldar no play off de ascenso

O Burela venceu con comodidade o Azulejos y Pavimentos Brihuega por 6-0 nun partido de clara cor laranxa que finiquitou na primeira parte. O conxunto dirixido por Suso Rey dominou sen demasiadas dificultades a un conxunto visitante que amosou pouco poder ofensivo. Clebinho e Purao, ambos por partida dobre, encarrilaron o choque en cinco minutos, entre o oito e o doce, e Víctor Cachón redondeou un primeiro tempo que evidenciou a diferenza entre ambos os conxuntos. Na continuación, os mariñáns alcanzaron o set en branco, tras un disparo de André que desviou Zamo e desorientou completamente o meta visitante. Co 6-0, o Brihuega intentou a opción do porteiro xogador, que resultou infrutuosa xa que os locais mantiveron a concentración ata o asubío final.

A peor noticia para os burelenses produciuse no minuto cinco de xogo cando Edu tivo que retirarse do encontro lesionado. Brais entrou á pista e nas escasas oportunidades que xerou durante todo o choque o Brihuega demostrou a súa calidade. Tras os resultados desta última xornada (3-2 gañou o Zamora ao Andorra e vitoria por 4-7 do Gáldar en Albacete), o Burela finaliza a liga regular en quinta posición e deberá medirse no play off de ascenso á División de Honra ao Colegio Arenas Gáldar. Os canarios contarán co factor cancha ao seu favor aínda que antes deberán pasar por Vista Alegre, no primeiro encontro da eliminatoria.