21/06/2011

Recoñecemento aos logros burelistas

Recoñecemento aos logros burelistas

O alcalde de Burela, José María González Barcia, recibiu esta tarde as/os integrantes do Burela FS Pescados Rubén e Burela FS Xuvenil no consistorio en recoñecemento á súa meritoria traxectoria en 20010-11, como semifinalista da XVII Copa de España de Fútbol Sala Feminino e subcampión de Galicia, respectivamente.


Xogadoras e xogadores estiveron acompañados dos corpos técnicos e do director xeral da entidade, José Luis Sáez, ademais dos directivos Antonio Rodenas e Marcelino Luna. Tamén acudiron ao acto os edís de Xuventude e Deportes, Beatriz Piñeiro; de Obras, Manuel Fernández; e de Cultura, Mónica Pedre; así como os concelleiros Alfredo Llano e Neves Cando, do PSOE e BNG, respectivamente.


José María González Barcia felicitou os cadros feminino e xuvenil polos éxitos acadados e por “proxectar o deporte, como representantes da vila e levar o nome de Burela por toda España”. O alcalde de Burela comprometeuse a continuar coa colaboración que “comezaron Alfredo Llano e Neves Cando na anterior lexislatura porque este debe ser un proxecto conxunto, de todos. Intentaremos implicarnos ao máximo dentro dos nosos límites”.


José Luis Sáez quixo agradecer a axuda prestada polo Concello ao longo dos últimos anos e destacou a intención do novo goberno de seguir apostando pola potenciación da práctica deportiva e polo CD Burela FS. “O club agradece o traballo de todos os xogadores/as e corpos técnicos na tempada. Sentímonos orgullosos de todos os nosos equipos; os cadros senior son o espello onde se miran os case 200 rapaces e rapazas que adestran na ED EON Burela FS e ese é o mellor trofeo que pode brillar nas nosas vitrinas” dixo o director xeral burelista. 


Pola súa banda, Claudia Rodríguez e Boris Baltar, capitáns dos seus respectivos equipos, agradeceron o esforzo dos compañeiros/as, a colaboración das institucións e o apoio dos corpos técnicos. Ambos os dous recibiron de mans do alcalde burelao un agasallo conmemorativo.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.