Técnica e Táctica para os futuros adestradores, nas mans de Javier Pardeiro

O estratega do Burela FS Pescados Rubén feminino, Javier Pardeiro, alternará  o seu encomiable labor nas canchas coas aulas do IES Monte Castelo nas vindeiras semanas, como mestre de Técnica e Táctica no curso de Instrutor de Fútbol Sala da Federación Galega de Fútbol.

Na súa primeira toma de contacto, o domingo pasado, o preparador laranxa destacou o alto nivel e a predisposición dos futuros adestradores mariñáns de base. “As clases son moi activas, os alumnos son moi participativos” dixo Javier Pardeiro, que tamén explicou que “teremos a oportunidade de completar os coñecementos da materia con sesións de pista”.

Tras o adoutrinamento do adestrador burelista, o alumnado completará o ciclo con 80 horas de formación práctica en institucións, clubs ou entidades deportivas privadas da zona.

O de Burela é o único curso da especialidade de instrutor de fútbol sala que se imparte en Galicia no presente ano académico. Baixo a coordinación do ex-adestrador do Superti-A Pontenova, José Ramón Rodríguez, Josiño, o ciclo presenta 280 horas de duración e xa contou entre o seu profesorado co director da ED EON Burela FS, Alfonso Mera; o médico do club laranxa, Javier Couce; e os psicólogos Juana Blanco e Marcelino Luna. No bloque común, que compartiron o curso de fútbol sala e o de fútbol, con sede en Ribadeo, o estudantado aproximouse a conceptos de anatomía, psicopedagoxía, socioloxía, organización e lexislación e mais educación física de base. O programa específico inclúe técnicas individuais e colectivas, táctica e sistema de xogo, regras de xogo, educación física específica, metodoloxía e dirección de equipos.