05/02/2014

O Burela FS en semifinais da Copa Xunta co Azkar, tras a vitoria fronte ao Parrulo (1-3)

O Burela FS en semifinais da Copa Xunta co Azkar, tras a vitoria fronte ao Parrulo (1-3)

O Burela FS Pescados Rubén xa é semifinalista da Copa Xunta de Galicia tras a vitoria de onte fronte ao Parrulo FS (1-3), de Segunda División. Os pupilos de Juanlu recibirán en Vista Alegre o Azkar Lugo FS no seguinte chanzo, antes da final, coa data aínda pendente de acordar entre os dous equipos.



O cadro mariñán, con numerosas ocasións aínda que tamén con falta de acerto en finalización, puido adiantarse cun tanto temperán, no minuto 4, de Burrito. “A oito minutos para o descanso cargámonos de faltas e vímonos obrigados a especular e protexernos para garantir a vantaxe do 0-1” xustificaba o técnico laranxa.



“No segundo tempo comezamos moi ben e puidemos resolver o encontro” aseguraba Juanlu, incidindo na rápida reacción goleadora do equipo, con Matamoros, xa no 21, e de novo Burrito, no 24. “Despois a cita perdeu ritmo porque nos relaxamos” admitía o adestrador mariñán, nunha cita que chegou á bucina final con 1-3, nun disparo de Oly a tres minutos para o desenlace, que tocou no corpo de Iago Míguez.



“A Copa Xunta é unha competición á que lle temos moito respecto e queremos facelo ben, ademais agora, en semifinais, toca un encontro con moita motivación ante o Azkar. A nosa intención é xogar a próxima semana, se non pode ser haberá que deixalo para o mes de marzo” explicaba o técnico laranxa.



O Cidade de Narón será un dos protagonistas da outra semifinal, despois de vencer ao Noia FS (4-2); o seu rival decidirase o venres no enfrontamento entre Pazos de Borbén e Santiago Futsal (21.00 horas).




Ficha técnica



O Parrulo FS: Canoli, Óscar, Villas, Jacobo e Borja, no cinco inicial; tamén xogaron Isma, Oly, Cagi, Bebeto e Christian



Burela FS Pescados Rubén: Álex, Mimi, Burrito, Matamoros e Carlitos, no cinco inicial; tamén xogaron Iago Míguez, Isi, Juanma e Antoñito



Árbitros: Trebolle González // Bello Castro (Lugo)



Goles: 0-1, minuto 4, Burrito; 0-2, minuto 21, Matamoros; 0-3, minuto 24, Burrito; 1-3, minuto 37, Oly



Tarxetas: Polo Parrulo FS, Jacobo foi expulsado por dobre cartón amarelo; por Burela FS, amarelas a Isi e Matamoros



Incidencias: Partido correspondente a cuartos de final da XXIII Copa Xunta de Galicia, disputado no pavillón ferrolán da Malata

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.