20/02/2015

Juanma estrea banco na pista do Santiago Futsal

Juanma estrea banco na pista do Santiago Futsal

O secretario técnico do CD Burela FS Pescados Rubén e segundo de Juanlu en Primeira LNFS, Juanma Marrube, estrearase á fronte dos bancos o sábado coa visita do equipo laranxa de Terceira División á pista do Santiago Futsal B (Santa Isabel, 17.00 horas).



Juanma colle as rendas do filial mariñán no momento máis doce dun conxunto repleto de novas promesas, que encadea pleno de triunfos na segunda volta, con 9 puntos de 9 en xogo. “Estou encantado co equipo; está nun excelente momento e iso nótase. Os rapaces están adestrando ao 200%; están implicados e demostran moitas ganas en todas as sesións” valoraba o novo técnico, internándose nunha nova etapa que xa ansiaba: “Tiña inquedanza por asumir esta responsabilidade, por poder tomar decisións á fronte dun equipo. Chego coa vantaxe de que xa coñecía o grupo, un gran paso para estrearme nestas tarefas” explicaba Juanma, “seguir disfrutando, como o fixen sendo xogador, e sobre todo seguir aprendendo e formándome tras o exame de cada sábado”.



O primeiro reto será un derbi de filiais; dende a terceira praza con 31 puntos, o Santiago Futsal agarda os mariñáns, que ocupan a décima posición, con 19. “Espero un bo derbi. É un rival de altura, indícao a clasificación, que a estas alturas da competición acostuma ser xusta. Enfrontáremonos a un corte de xogadores moi similar ao noso, de xente nova en formación, e a unha escola cun xogo moi definido como é Santiago” reflexionaba Juanma sobre o rival, apostando por “xogo atrevido e con posesión do balón” para os laranxas.



Na primeira volta o resultado caeu do lado dos composteláns, 1-2.



 

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.