14/01/2016

Daniel Ibañes formaliza a renovación con Burela FS para 2016-17

Daniel Ibañes formaliza a renovación con Burela FS para 2016-17

O técnico do CD Burela FS Pescados Rubén cumprirá o seu segundo ano á fronte do banco laranxa en 2016-17. O hispano-brasileiro, que chegou á Mariña para asumir as rendas do equipo de Primeira LNFS esta tempada recollendo o ronsel de Juanlu Alonso, formalizou a súa renovación por un ano na sede do club esta mañá, xunto ao presidente da entidade, Manuel Blanco, e o vicepresidente, José Luis Sáez. “O nome de Daniel Ibañes xa figura na historia do club; queremos apostar pola súa profesionalidade á fronte dun cadro que xa nos concedeu o privilexio de poder disputar, por segundo ano, a Copa de España e que seguirá traballando por conseguir máis logros” explicou o dirixente laranxa.



“Estou moi a gusto aquí e moi contento pola confianza depositada no meu traballo; desde o día que cheguei o trato foi inmellorable tanto do club e dos xogadores como da vila” recoñecía así Daniel a súa satisfacción polo acordo tras a sinatura da súa continuidade. “Tiña moitas ganas de volver a unha liga tan competitiva e bonita como a española. Creo que estamos cumprindo co obxectivo; traballamos pola consolidación na categoría e gañamos o premio de disputar por segunda vez na historia do club a Copa de España” reflexionaba o adestrador burelista sobre os seus primeiros meses na Mariña facendo mención tamén aos desexos deportivos a curto e longo prazo: “A competición está moi igualada e oxalá poidamos seguir pelexando pola motivación do play off. Espero acabar ben este ano e seguir a próxima tempada facéndoo mellor”.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.