01/04/2016

O mellor entre os mellores recala en Vista Alegre (TVG2, 18.15 horas)

O mellor entre os mellores recala en Vista Alegre (TVG2, 18.15 horas)

Vista Alegre xa está preparado para recibir mañá ao mellor entres os mellores de Primeira LNFS. O recente campión da Copa de España e actual líder ligueiro, Movistar Inter, visitará pista da bomboneira a partir das 18.15, coa emisión en directo da TVG2. “Vista Alegre ten que estar ata a bandeira; será un partido moi bonito para a afección. Ese ambiente, o apoio e os ánimos do público axudarannos moito para querer superarnos aínda máis” explicaba o cocapitán do CD Burela FS Pescados Rubén Edu, un dos grandes referentes dos seareiros mariñáns.



“Estamos nunha boa liña, xogando ben e defendendo ben. Se nos mantemos así podemos dar incluso a sorpresa. A pesar das baixas, podemos facelo ante a nosa afección, porque sairemos cunha motivación extra” adiantaba con optimismo o naronés, moi consciente da complexidade do reto. “Sabemos que é o mellor equipo do mundo; o noso obxectivo é estar no partido ata o final, se chegamos aos últimos minutos con vida podemos conseguilo. En Guadalajara xa demostramos que podemos plantarlles cara” facía así referencia o meta ao último enfrontamento, na Copa de España a mediados de marzo, con vitoria nas semifinais para os verdes por 3-6.



Mañá, o técnico burelista non poderá estar á fronte do banco en Vista Alegre; Daniel Ibañes foi sancionado con 2 partidos de suspensión tras a expulsión da semana pasada en Santiago. Xunto á ausencia de Mata, o vestiario laranxa tampouco poderá contar con Isi, por molestias no xeonllo dereito, nin con Chano, con 1 partido de sanción pola vermella en Compostela.



Acceso a Vista Alegre



Vista Alegre abrirá mañá portas e taquilla ás 17.00 horas. O club burelista puxo á venda un total de 1.200 localidades para presenciar o espectáculo. As entradas de socios poderán adquirirse ata as 18.00 horas; a partir desa hora poderán liberarse no caso de que se necesiten.



Os socios accederán ás instalacións pola Porta 1 e os non socios pola Porta 4.



100% Galega



Coincidindo coa cita de luxo, a Bomboneira unirase á campaña de promoción de leite 100% Galega co apoio ao sector leiteiro que está a levar a cabo a Xunta de Galicia e que permitirá ao público asistente ao encontro degustar este leite de calidade a través da repartición gratuíta de minibricks.



Convocatoria Burela FS Pescados Rubén: 1. Edu, 5. Iago Míguez, 9. Iago Rodríguez, 12. Petry, 13. Álex, 17. Carlitos, 18. Jorge, 20. Chino, 23. Antoñito, 27. Renato, 30. Hélder

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.