04/03/2017

Vista Alegre e afección recuperan a vitoria para o Pescados Rubén

Vista Alegre e afección recuperan a vitoria para o Pescados Rubén
O Pescados Rubén Burela FS rompeu a mala dinámica fronte ao Plásticos Romero Cartagena (6-4) reafirmando a súa fortaleza en Vista Alegre e a gran resposta da afección. Malia comezar contra corrente, o cadro mariñán soubo manter a orde que reclamaba Tomás de Dios para ir gañando en ocasións, perigo e acerto finalizador, para recuperarse e marchar ao descanso con 3-1 a favor. Demasiado premio obtivo o Cartagena nos compases iniciais. Aínda non se cumprira o segundo minuto de xogo, cando se adiantou no marcador por mediación de Juanpi; era a súa primeira chegada á portería de Edu e contou coa fortuna dun esvarón da defensa laranxa para descoidar ao naronés cun disparo raso ao pau. Viviu entón os seus mellores minutos, con todo, este era o gran desafío do Pescados Rubén, apostaba ao todo e así o deixou claro, arroupado por un grande ambiente na bancada. Soubo manter a calma e aos poucos foise facendo co marcador. Bellvert avisou no minuto 5 ao pau, pero foi Iago Míguez o encargado de subir o empate, no 9, recibindo un disparo cruzado de Cuco. Tan só uns segundos despois, chegou a de ouro do 18 burelista, anotando desde a banda nun saque de esquina con Cuco como iniciador. Vista Alegre comezou a respirar e a punto estivo de cantar o terceiro no ecuador, que o ex do Burela Enrique Cánovas sacou baixo paus. Fronte ás tentativas dos visitantes, o muro de Edu desartellábao todo. Volveu intentalo o incisivo Bellvert, en 13, co pau como obstáculo, pero non errou Antoñito no 15, que asinou o terceiro laranxa recibindo en pase longo e superando ao gardameta murciano. O Pescados Rubén medrou en ocasións tras o descanso, aínda que o gol se fixo esperar. O Cartagena apostou polo porteiro-xogador con Jesús no minuto 30, tras o cuarto dos galegos, coa marca de Cuco, que aproveitou o rexeite dun potente disparo de Iago Rodríguez. O quinto, para xúbilo da gran Bancada Laranxa, chegou no minuto 33, nas zapatillas de José Carlos a porta baleira; segundos antes, unha falta de Rodrigo anulara outro gol dos laranxas sen meta. Con todo, o Cartagena si que atopou froitos no xogo de cinco; Juanpi volveu perforar a rede, no 34, e Rahali anotou o 5-3 no 37. José Carlos, de novo a porta baleira, ampliou a fend a falta de minuto e medio para a bucina final. Rodrigo puxo máis emoción nos últimos segundos co 6-4, pero o Pescados Rubén soubo manter a renda e a súa máis que merecida vitoria. Ficha técnica Pescados Rubén Burela FS: Edu, Iago Míguez, Isi, Antoñito, José Carlos, cinco inicial; tamén xogaron Iago Rodríguez, Bellvert, Cuco, Hélder Plásticos Romero Cartagena FS: Raúl, Enrique, Josema, Juanpi, Adeirton, cinco inicial; tamén xogaron Rodrigo, Elián, Rahali, Jesús, Asensio, Dani Blanco Goles: 0-1, minuto 2, Juanpi; 1-1, minuto 9, Iago Míguez; 2-1, minuto 9, Bellvert; 3-1, minuto 15, Antoñito; 4-1, minuto 30, Cuco; 5-1, minuto 33, José Carlos; 5-2, minuto 34, Juanpi; 5-3, minuto 37, Rahali; 6-3, minuto 39, José Carlos; 6-4, minuto 40, Rodrigo Árbitros: Gallo Suárez // Velasco Martínez (Asturias). Por Burela, amarela a José Carlos (minuto 28). Por Cartagena, amarela para Jesús (minuto 26), Josema (minuto 29), Raúl (minuto 30), Rodrigo (minuto 32), Incidencias: Partido correspondente á xornada 23 de Primeira División LNFS disputado no pavillón Vista Alegre de Burela ante uns 1000 afeccionados.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.