27/04/2017

Cinco anos e unha final

Cinco anos e unha final

O Pescados Rubén Rubén pechará mañá en Vista Alegre cinco anos de traballo, ledicias e afán de superación en Primeira División coa gran final de finais que decidirá a súa continuidade no mellor futsal. Para iso terá que agarrar con máis forza ca nunca os 3 puntos fronte ao  UDDM Levante (12º clasificado). A cita, que arrincará ás 21.00 horas –horario unificado- e que contará coa asistencia do seleccionador nacional, José Venancio López Hierro, poderá seguirse en directo por streaming LNFS.



A pouco máis de 24 horas para saltar á pista, Tomás de Dios amósase confiado nas posibilidades do equipo e na solidez de Vista Alegre para que mañá a Bomboneira se converta nunha gran festa, a pesar da boa dinámica coa que chega o rival: “Na casa somos fortes, a afección dános unha gran forza mental; con ela o equipo está máis conectado. Sabemos que o Levante non perdeu nos últimos cinco partidos; será un encontro de tensión, presión e adversidades, pero imos sacar os tres puntos” aseguraba o técnico.



“Estaremos plenamente concentrados os 40 minutos. Despois teremos a incerteza de esperar resultados”, explicaba De Dios, aludindo aos outros dous candidatos coa permanencia en xogo, Cartagena e Gran Canaria, que recibirán a Santiago Futsal (11ª praza) e Palma Futsal (5ª praza) respectivamente.




Matamoros regresará á convocatoria tras realizar unha semana de adestramento, aínda que non ao cento por cento; serán baixas de Jorge Bellvert e Chano, por lesión, e Joan Miñano, por decisión técnica.



 




Convocatoria Pescados Rubén Burela FS: 1 Edu, 5 Iago Míguez, 7 Isi, 9 Iago Rodríguez, 10 Matamoros, 13 Álex, 17 Carlitos, 21 Cuco, 23 Antoñito, 27 Renato, 30 Hélder, 31 José Carlos



Convocatoria UDDM Levante: 1 Sergi, 15 Yeray, 2 Cecilio, 4 Lucho, 7 Alex Oviaño, 8 Borja Milán, 9 Márquez, 10 Kiko, 14 Sena, 17 Emilio Buendía, 18 Tripodi




Entrada gratuíta



Vista Alegre terá abertas as súas portas de forma totalmente gratuíta ata as 20.30 h. A partir desa hora, tamén accederán gratis os afeccionados/as que acudan vestidos de laranxa. De 19.00 a 20.00 horas, os socios laranxas terán unha Happy Hour con 2x1 en cañas na cafetería Vista Alegre, viñoteca O Traste e Parrillada de Jandro.



Xantar da Irmandade Laranxa



As persoas que así o desexen aínda poderán poderán apuntarse ata mañá, tanto na sede laranxa coma no pavillón, para gozar do Xantar da Irmandade Laranxa (sábado 6 de maio, 14.00 horas, pavillón Monte Castelo). O prezo do menú de ata 14 anos será de 8 euros e a partir de 15 anos será de 16 euros.



Viaxe de Copa Galicia



Mañá tamén será o último día para reservar praza na viaxe da Festa Irmandiña, coa final de Copa Galicia o vindeiro luns, 1 de maio, en Pontevedra con Pescados Rubén Burela FS-Santiago Futsal (18.45 horas) e Poio Pescamar FSF-Ourense Envialia (17.00 horas). O club poñerá a disposición dos todos os interesados/as o desprazamento en autobús e entradas para os dous partidos, de forma totalmente gratuíta para os socios e por 15€ para non socios; a viaxe realizarase cun mínimo de 50 afeccionados/as.



 

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.