01/09/2017

Julia Forsiuk: 'Espero aprender moito en Burela'

Julia Forsiuk: 'Espero aprender moito en Burela'

A ucraína Julia Forsiuk (Kiev, 1985) foi presentada polo Pescados Rubén Burela FS na compaña do presidente, Manuel Blanco, e do directivo José Manuel Vázquez. “Esta a mellor liga do mundo, para min era un soño xogar no fútbol sala español. Espero aprender moito en Burela, este é un club moi profesional, e tamén poder axudar a conseguir títulos”, explicaba a nova 37 burelista, que xa puido debutar a fin de semana pasada no Torneo Cidade Viana do Castelo.



“En Portugal tivemos a oportunidade de medirnos a rivais de calidade, os enfrontamentos con Poio foron moi bos; somos varias xogadoras novas, aínda temos que traballar para axustarnos. A pretempada está sendo moi boa; estamos traballando ben para comezar nas mellores condicións a liga” explicaba a xogadora universal, moi ilusionada nun novo comezo, na súa nova experiencia en España, logo de realizar xa parte da pretempada co conxunto laranxa o ano pasado e defender ao Leganés Másdeporte na segunda volta da liga: “En Burela estou mellor. En Leganés estiven só catro meses, pero foi complicado para poder entenderme coas miñas compañeiras e tamén para adaptarme porque o fútbol sala en Ucraína é moi diferente. Non falaba español e ese foi un grande obstáculo. Aquí e agora xa é diferente e as miñas compañeiras estanme axudando moito”, explicaba Julia.




Sábado 2, Pescados Rubén-Poio Pescamar (Vista Alegre, 19.00 horas)



“Queremos gañar, pero o máis importante é que é a presentación do equipo e das novas incorporacións. Será un partido de nervios para nós, pero creo que sairá todo ben e que poderemos gañar” explicaba Julia Forsiuk en vésperas da presentación do equipo ante a Familia Laranxa, da posta de longo do Pescados Rubén Burela FS de Primeira RFEF ante a súa afección, mañá, a partir das 19.00 horas, con entrada gratuíta.



Julio Delgado e Lucas terán á súa disposición a todos os efectivos, aínda que Bea Mateos chegará con molestias.



En memoria de Beto



A Bomboneira gardará mañá un minuto de silencio en memoria do ex-burelista José Roberto Camilo Lima, Beto, que faleceu esta semana vítima dun cancro linfático.



Presentación do equipo de Liga Provincial



Nesta primeira cita ante o público burelista para o conxunto de Primeira RFEF, tamén será a presentación do equipo de Liga Provincial Feminina, que dirixirá Míchel Couceiro.



Copa Galicia Feminina



As mariñás estrearán a Copa Galicia o vindeiro mércores, 6 de setembro, na casa, co primeiro enfrontamento de grupos, ante o Viaxes Amarelle FSF. Será ás 20.30 horas, con entrada gratuíta.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.