Manzanares, para recuperar sensacións

O Pescados  Rubén Burela FS medirase na 11ª xornada ao Manzanares FS buscando recuperar as sensacións e o bo xogo laranxa (sábado 18, 18.15 horas, pavillón municipal). “O equipo está traballando con ganas, sabendo que temos que buscar nosa mellor versión no xogo, o que nos deu un bo rendemento nas primeiras xornadas” advertía Matamoros, na tenacidade mariñá por facer desaparecer as pantasmas das dúas últimas xornadas, sobre o que tamén incidía o técnico, Juanma Marrube: “O máis importante é que o equipo adestrou ben. Con dúas derrotas seguidas nunha boa liña, ao equipo custoulle dixerilo o luns e o martes, pero o mércores xa volveu ter a súa alegría. Agora temos que pensar en recuperar as sensacións e os tres puntos en Manzanares”.

Desde a sétima praza (18 puntos) os pupilos do Mariskal pelexarán a vitoria fronte ao duodécimo clasificado (12 puntos), que recibe os galegos coas boas vibracións de 5-1 fronte a Tenerife: “Estamos incidindo para recuperar a nosa fortaleza en defensa, algo que perdemos nas dúas últimas xornadas, traballar desde a defensa e intentar atopar unha mellor versión no xogo, alternar catro con xogo de pivote, ter mobilidade e profundidade e chegar con ocasións para facer goles” explicaba o 10 laranxa.

Juanma Marrube espera un “rival dinámico e atrevido”: “Espero un equipo que nos vai poñer as cousas difíciles porque ten moi claro ao que xoga. A súa cancha é máis lenta do habitual, é un equipo de moita experiencia, de moita envergadura e que gaña a miúdo no xogo de contacto, sae ben con porteiro xogador desde bandas, ten moi ben definido o seu ataque…” explicaba o adestrador, coincidindo co pichichi burelista: “É unha cancha complicada. É un equipo con xogadores con moita experiencia, ata en Primeira División; na súa pista e coa súa afección vai ser un partido bastante complicado. Ademais teremos o hándicap de xogar nunha superficie de goma, á que non estamos afeitos”, valoraba Matamoros, xa en plena forma no seu regreso ás pistas: “Atópome ben, pero non tan ben como quixese. Prefiro conseguir vitorias que facer goles. Cada vez estou mellor fisicamente e volvo ter esa chispa aínda que espero estar aínda mellor e achegar máis ao equipo”.

A expedición partirá esta noite ás 22.30 horas para adestrar xa no seu destino mañá, ás 10.00 horas. José Antonio LUna, Colacha, incorporarase ao grupo para a última sesión, logo da súa frutífera convocatoria, e con presenza goleadora, con España Sub-19 nas dous amigables fronte a Francia (5-2 e 4-0) en Estremadura.

Convocatoria Pescados Rubén Burela FS: 1. Edu, 4. Víctor, 5. Hélder, 6. Luisma, 7. Chus, 9. Colacha, 10. Matamoros, 11. Cora, 12. Renato, 13. Álex, 14. Pope, 16. Pitero, 20. Kelson