14/12/2017

Colacha: 'Betis é unha pista moi complicada, só Barcelona gañou alí'

Colacha: 'Betis é unha pista moi complicada, só Barcelona gañou alí'

O ala andaluz José Antonio Luna Guijarro, Colacha, volve á súa terra esta fin de semana co Pescados Rubén Burela FS para medirse no último desprazamento da primeira volta e do ano ao Real Betis Futsal (sábabo 16, 19.00 horas, pavillón municipal de Amate).



“Imos con moitas ganas. É un rival directo. Temos que facer o noso traballo para saír airosos dunha pista moi complicada. Alí só puido gañar Barcelona” advertía o andaluz, incidindo na proximidade entre a sexta praza laranxa (25) e a décima dos sevillanos (19), con tan só 6 puntos de fenda.



Os pupilos de Juanma Marrube queren despedir 2017 con boa dinámica neste sprint final antes do ecuador: “No noso pensamento só están os tres puntos; logo de empatar na casa, con Mengíbar, só nos vale a vitoria, coa que poderemos meternos nos postos de arriba” explicaba o 9 laranxa, ante unha tarefa ardua na xornada 14: “Espero un Betis moi competitivo, con bos xogadores e calidade individual, cun grupo bastante equilibrado, aínda que creo que o seu verdadeiro potencial non está reflectido na táboa. Cando se compenetre un pouco máis será un equipo moito máis efectivo”, explicaba o internacional sub-19 do equipo dos ex-burelistas Chano e Jorge Bellvert. 



Os mariñáns buscarán reafirmar ante Betis a boa segunda parte do sábado pasado ante Mengíbar, unha boa reacción coa que puideron dar a volta ao marcador, aínda que ao final só se puido quedar nun 3-3, con certo ronsel agridoce: “Só nos queda corrixir os erros, como nos di o míster; para iso estivemos traballando duro e concentrados durante a semana, para sacar os tres puntos” concluía o ala cordobés.



A expedición laranxa partirá esta noite, ás 23.00 horas, con rumbo a Sevilla. Mañá, ás 12.00 horas, pechará a semana de adestramentos en Amate.



Convocatoria PROVISIONAL Pescados Rubén Burela FS: 1. Edu, 4. Víctor, 5. Hélder, 6. Luisma, 7. Chus, 9. Colacha, 11. Cora, 12. Renato, 13. Álex, 14. Pope, 17. Nito, 20. Kelson



 




 

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.