05/04/2018

Vista Alegre, bálsamo no regreso de liga coa chegada de Móstoles

Vista Alegre, bálsamo no regreso de liga coa chegada de Móstoles
O Pescados Rubén Burela FS arróupase no mauselo de Vista Alegre para retomar a competición ligueira tras ver escapar o título de Copa Galicia no último suspiro o domingo pasado fronte ao Poio Pescamar FSF. As laranxas voltarán ao parqué da Bomboneira o sábado (18.30 horas) coa visita do FSF Móstoles, na 23ª xornada de Primeira RFEF.

“Foi doloroso, pero sabemos da importancia da liga. A Copa Galicia queda atrás e agora na nosa cabeza só está sumar partido a partido na liga” explicaba unha das incorporacións de inverno ás filas mariñás, Camila Gadeia, na antesala dunha cita ante a que se presenta con optimismo, co apoio da Bancada Laranxa e á caza do podio. Dende a cuarta praza (51 puntos) e coa gran vitoria fronte ao Cádiz (0-11) da última xornada, o Pescados Rubén medirase ao undécimo clasificado, que tamén chegou ao descanso con triunfo, 4-1 con Leganés: “Xogar na casa sempre nos axuda, coa nosa grande afección. Sabemos que é un rival duro, pero tamén somos moi conscientes do que implican os tres puntos e queremos a todo custo a vitoria, imos loitar con todo” advertía Cami, sen tatexar.

A peche ‘canarinha’ retoma a competición de liga, con moitas ganas, despois dunhas semanas no seu país por temas burocráticos: “Dende o Brasil estiven acompañando o equipo; alí tamén adestrei para volver ben á dinámica de grupo e creo que incluso regresei mellor porque despois destes meses xa me adapto e entendo mellor o xogo de Julio” valoraba a 8 burelista.

As mariñás miran ao podio na busca de arañar algún chanzo. A tan só 1 punto das laranxas, o Jimbee Roldán (52) defenderá a terceira praza fronte ao actual campión irmandiño, o Poio; no cumio, a xornada depara o duelo entre UA Alicante (54) e Atlético de Madrid Navalcarnero (53). “Temos que facer a nosa parte primeiro e despois se nos benefician os resultados dos outros enfrontamentos mellor”, concluía Cami.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.