13/06/2019

Todo listo para a Copa de SM A Raíña

Todo listo para a Copa de SM A Raíña
O salón de plenos de consistorio de Burela acolleu esta tarde a presentación da I Copa de SM A Raíña (14-16 de xuño). Xunto ao alcalde, Alfredo Llano, e o concelleiro de Deportes, Ramiro Fernández, estivo a deputada de Economía, Mayra García, ademais do presidente do Pescados Rubén Burela FS como club anfitrión, Manuel Blanco, e o director de Área do CNFS da RFEF, José Miguel Calle.

Todos os presentes coincidiron en definir a cita como un grande éxito do fútbol sala nun momento no que o deporte feminino está conseguindo ocupar o sitio que merece. Alfredo Llano deu a benvida a todos os clubs desexándolles moita sorte no campionato: “Burela é unha localidade de grande afección ao fútbol sala e por iso Vista Alegre responderá para a ocasión gozando dos mellores equipos de Primeira”, coincidindo con Ramiro Fernández en “animar a xogadoras e técnicos a gozar destes días na Mariña e desexar sorte a todos, aínda que un pouco máis a Burela”. Desde a Deputación de Lugo, Mayra García felicitou o Concello e o club laranxa por recibir unha edición máis, e xa van tres, a Copa, ademais de reafirmar a súa aposta e compromiso polo deporte en Lugo. Manuel Blanco e José Miguel Calle, para concluír, destacaron a calidade e rivalidade que se vivirá esta fin de semana na Bomboneira: “A I Copa da Raíña é un éxito porque reflicte a firme aposta que desde a Federación estamos facendo polo deporte feminino, con realidades, non só con palabras. E para este feito histórico elixiuse Burela porque é un club que traballou e conseguiu un deporte profesional en igualdade. Este é o punto de partida; xa temos en proxecto poder facer unha final four masculina e feminina na mesma sede” explicaba Calle.

Impresións e sensacións de adestradores e xogadoras a menos de 24 horas do inicio da ansiada cita pecharon o acto, para dar paso aos detalles na reunión técnica entre o Comité de Competición e os delegados/as dos clubs.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.