29/11/2019

O Pescados Rubén planta cara a Jaén (2-2)

O Pescados Rubén planta cara a Jaén (2-2)
O Pescados Rubén Burela FS demostrou unha vez máis que non se rende e que merece seguir medrando na elite. Os pupilos de Juanma Marrube plantaron cara a todo un Jaén Paraíso Interior (2-2), dominando en xogo, xerando ocasións e freando a ofensiva visitante, que só puido ver a rede de Edu en dobre penalti.

Saíron en avalancha os do Mariskal. Antes do minuto 3, R. Vargas e Luisma, por partida dobre, xa puxeron a proba a Fabio e foi finalmente Renato o encargado de adiantar os laranxas, nun roubo en cancha local. Medrou en ocasións o Pescados Rubén, con Mata en pase longo, no 5, e Álex Diz e Renato, no 8, pero volveuse atar co lastre das cinco faltas, cumpríndose a medianía da primeira parte. Aí foi cando aproveitou Jaén, que só puido perforar a meta local en dobre penalti, no 11, con Carlitos. O naronés freou o excesivo premio no seguinte minuto ante o 10 andaluz, pero non puido facer nada no 17, con outro castigo desde os dez metros. Foron valentes os mariñáns buscando a portería rival fronte a un gran Fabio, que mantivo a renda dos de Dani Rodríguez con aparicións providenciais ante Vargas e Joselito, ademais do asedio incesante de Mata nos últimos segundos.

R. Vargas e Míchel foron os primeiros en tentear as metas, antes do 22, aínda que a enteireza seguiuna demostrando o conxunto galego. Reviviu a Bomboneira coa maxia de Matamoros no 34, que cazou o rexeite xienense ante tentativa de Joselito. O 10 burelista volveu facer vibrar á Bancada Laranxa con dúas grandes aparicións no 35, de cabeza, e o 36, nun disparo que se foi alto. Vargas e Pope tiveron no terceiro nos seguintes compases. Edu tamén freou a Mauricio para manter o empate, sen demasiados problemas. Fabio volveu aparecer fronte a Álex Diz. Con 43 segundos apostou Jaén por xogo de cinco, a por os tres puntos, e houbo de todo. Os visitantes dispuxeron da máis clara de toda a segunda parte e Joselito oíu a bucina final in extremis coa última ocasión do partido.

Ficha técnica

Pescados Rubén Burela FS: Edu, Luisma, R. Vargas, Renato, Pope, cinco inicial; tamén xogaron Lucho, Matamoros, Álex Diz, Joselito, Pitero, Everton

Jaén Paraíso Interior FS: Fabio, Mauricio, Alan Brandi, Míchel, Piqueras, cinco inicial; tamén xogaron Fran Pena, Víctor Montes, Carlitos, Chano, Campoy, Maico

Goles: 1-0, minuto 3, Renato; 1-1, minuto 11, Carlitos (d.p.); 1-2, minuto 17, Carlitos (d.p.); 2-2, minuto 34, Matamoros

Árbitros: Blas Alonso // Romero Candela. Por Burela, amarela a Edu (minuto 4), Renato (minuto 10), Everton (minuto 10), R. Vargas (minuto 37). Por Jaén amarela a Alan Brandi (minuto 10).

Incidencias: Partido correspondente á xornada 11 de Primeira División disputado en Vista Alegre ante unhas 900 persoas

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.