13/02/2020

A Alma Laranxa fronte a ElPozo no regreso da Liga

A Alma Laranxa fronte a ElPozo no regreso da Liga
A liga regresa este sábado, con outro compromiso de desafío máximo para o Pescados Rubén Burela FS. Tras rozar onte a proeza en cuartos de Copa do Rei en Barcelona e cun só penalti como escollo insalvable, a Alma Laranxa retomará a liga fronte ao outro titán, ElPozo Murcia Costa Cálida. A Bomboneira vestirá as súas mellores galas o sábado para a xornada 21 de Primeira, a partir das 18.30 horas, para arroupar coma nunca a un equipo humilde que vén de demostrar que pode tutear aos grandes e sen complexos.

“A Copa era un premio. Estivemos moi preto da final four; xogamos moi ben, soubemos sufrir, viuse un Burela con garra e con orgullo. Este partido reforza a nosa identidade como un equipo sólido e competitivo. Isto é o que temos que trasladar á liga para conseguir a permanencia”, así confesaba unha das últimas incorporacións laranxas e autor dun dos tantos galegos no Palau, o brasileiro Xande, que chegou dos seus compromisos coa Selección Uruguaia o martes para sumarse á expedición copeira: “Para min é sempre unha honra defender a Celeste, non puidemos conseguir a clasificación para o mundial, pero rendemos a un alto nivel e eu puiden adquirir ritmo para reincorporarme mellor ao traballo do Pescados Rubén. Viña con confianza e puiden xogar máis minutos do que realmente esperaba. Foi un gran partido co gran ambiente do Palau”.

ElPozo saltará ao parqué na cuarta praza (37 puntos) con ganas de recuperar o triunfo tras o 2-0 na pista do Palma antes do descanso e mellorar así os números a domicilio, con 5 das súas 6 derrotas lonxe da casa. “É un dos grandes, pero creo que podemos conseguir puntuar na casa, ofrecendo tanto a versión de onte en Copa coma a de aquí contra Movistar”, advertía o novo 15 burelista, incidindo no reforzo do equipo tras o seu paso por Barcelona a pesar do cansazo.

Os pupilos de Juanma Marrube volverán aos adestramentos esta tarde, ás 15.40. A última sesión está prevista para mañá ás 9.30 en Vista Alegre. Pola súa banda, ElPozo tamén adestrará mañá, en Marzán, ás 12.00 horas.

Venda anticipada para Non Soci@s. A venda anticipada para non soci@s estará aberta ata mañá, venres, ás 14.00 horas, na sede do club.

PREZOS NON SOCI@S

0-5 anos: Gratuíto (recollida de entrada no pavillón)

6-17 anos: 5 euros

Adult@: 12 euros

SOCI@S

Gratuíto


Rivais directos. Pelexando por saír da zona de perigo (10 puntos), o duelo entre Aspil Jumpers (11 puntos) e Zaragoza (13 puntos), previsto para o sábado á mesma hora, tamén pode influír nos intereses laranxas.

Noticias destacadas

Nun partido tan tolo como igualado, as Guerreiras Laranxas fallan nos penaltis ante un Poio cargado de enerxía.

Na primeira Tarde Laranxa desta tempada, ambos equipos do Pescados Rubén Burela FS se enfrontaron en Vista Alegre ao CD Melistar FS e ao Nueces de Ronda Atlético Torcal.

Un solitario tanto de Dany no segundo tempo bastoulles ás Guerreiras Laranxas para enlazar o seu quinto entorchado nesta competición.