Despois de máis de 12 horas de autobús e un repertorio moi amplo de karaoke, por fin a Copa da Liga 2019-20 chegou hoxe a Burela sobre o mediodía. As Guerreiras Laranxas foron recibidas no consistorio burelao polo alcalde, Alfredo Llano, e parte da corporación, ademais da afección máis achegada do equipo, mantendo as medidas sanitarias.

O Pescados Rubén Burela FS brindou o galardón, que constitúe o terceiro da tempada tras 4Nations Futsal e Supercopa de España, á sempre fiel afección e a toda A Mariña, cunha mensaxe moi especial para a Saúde Pública por coidarnos nestes momentos tan complicados e para a supervivencia dos postos de traballo de Alcoa.