2020/21 Club deportivo Burela Fútbol Sala Único club con equipos masculino e feminino en primeira división
Pescados Rubén
Novas
07/09/2020
Cilene Pereira nova renovación de Pescados Rubén
A brasileira Cilene Pereira aposta polo Pescados Rubén Burela FS unha tempada máis. A súa renovación foi unha das máis esperadas pola afección ao tratarse dunha das mellores xogadoras e máxima goleadora que, un ano máis, está disposta a levar ao equipo ao nivel máis alto.

A peche burelista cumprirá a súa quinta tempada defendendo a camiseta de Pescados Rubén e non dubida en mostrarse positiva e con ganas de gozar xunto ao equipo que creceu nos últimos anos. “Estou preparada e con moitas ganas de empezar para poder gozar e facer gozar á xente tamén”. Un ano máis, Cilene está lista para gañar títulos xunto ás Guerreiras Laranxas e levar ao equipo a un novo nivel.

Esta tempada 2020/21 chega co equipo fronte ao reto de defender varios campionatos conseguidos a tempada pasada. Con todo, os obxectivos están claros e a xogadora non ten dúbidas de que, aínda que a tempada pasada foi realmente boa, aínda poden mellorar como equipo. “O noso obxectivo é manter os títulos que gañamos a tempada pasada, traballar cada día para mellorar e buscar evolucionar pouco a pouco”.

Por suposto, aínda que quere comezar a nova competición, Cilene é consciente de que a volta chega nunha situación algo complicada. “Estamos a vivir un momento no que temos que coidarnos, pensar sobre todo na saúde.” Por suposto, a falta da afección nas bancadas farase notar, o que enrarecerá a volta á competición, pero iso non impide que a xogadora lembre con agarimo aos seguidores laranxas, aos que envía unha mensaxe. “Este ano imos vivir algo moi raro e ao que non estamos afeitos, que é xogar sen afección. Pero se que estaremos xuntos, aínda que esteamos lonxe”.
Publicidade
X Pechar