PREVIA X#7 Nueces de Ronda Atlético Torcal - Pescados Rubén Burela

A competición na Primeira Iberdrola FS feminina regresa, despois dunha semana de parón polos compromisos internacionais, coa visita este sábado do Pescados Rubén Burela á cancha do Nueces de Ronda Atlético Torcal (Pavillón de Guadaljaire, 18 horas). As malagueñas ocupan a oitava posición da clasificación con 9 puntos, logo de sumar tres vitorias e tres derrotas no arranque da tempada. No seu último encontro lograron un importante triunfo no pavillón dos Remedios ante o Ourense Ontime (3-4).

A portuguesa Carolina Pedreira, que xogou os dous encontros amigables entre Portugal e España, analiza como foi a concentración coa súa selección e o duelo de mañá ante o conxunto andaluz. “A verdade é que a concentración con Portugal estivo moi ben. Foi unha semana moi dura e intensa, con moitos adestramentos, e xogar contra España sempre é duro, pero vénnos xenial para preparar o que vén por diante”, sinala a á lusa.

Pedreira recoñece que volver á actividade no seu club é difícil despois dunha semana afastada do mesmo. “Sabemos que cando non xogamos ou se paran os adestramentos uns días, volver sempre custa un pouquiño máis, pero hai que adestrar intensamente e volver pensar na competición”, apunta.

En canto ao seu rival de mañá, a futbolista de Cascais é consciente de que terán que empregarse a fondo para traerse os tres puntos dunha pista na que sempre sofre o conxunto burelista para gañar. Nos únicos dous precedentes existentes, as Pícaras venceron o pasado curso por 1-3 e na campaña 2021/2022, estrea das malacitanas na máxima categoría, fixérano por un estreito 1-2. “Esperamos un partido complicado fóra de casa e nunha pista difícil, pero somos o Burela e sabemos que alá onde vaiamos temos que ir con todo e queremos gañar”, avanza.

O conxunto de Guadaljaire demostrou xa esta tempada ser capaz do peor e do mellor na súa pista, dado que lle puxo as cousas moi difíciles ao Futsi Atlético Navalcarnero (2-3), pero tamén caeu de forma contundente diante do AE Les Corts (0-4). “Son un equipo novo, moi intenso, rápido e que nos pode poñer nalgunhas dificultades, pero estamos a adestrar para chegar ao partido en bo estado e facer as cousas ben. Sabemos que lle puxeron as cousas difíciles a Futsi e que son capaces de conseguir resultados positivos ante os equipos de arriba, pero non esperamos menos de nós e queremos levarnos o partido”, sentencia a moza xogadora portuguesa.

Volve Cilene e é baixa Antía Pérez

O conxunto burelista desprazouse a terras malagueñas con doce futbolistas. Á convocatoria regresou a brasileira Cilene, despois de perderse o último partido por lesión, mentres que Antía Pérez únese a Irene Samper na lista de ausencias. A futbolista de Laza sofre unhas molestias nun dos seus xeonllos e non poderá estar mañá coas súas compañeiras.

Boa adaptación

Finalmente, Carolina Pedreira, que chegou este pasado verán a terras mariñás, valorou a súa adaptación a Burela e ao club, na que supón a súa segunda experiencia fóra do seu país, logo de que o pasado curso defendese as cores do Ence Marín Futsal. “A miña adaptación a Burela vai ben. Ao principio custa sempre un pouquiño porque é un mundo distinto, pero síntome ben co equipo e con todo. O que máis me sorprendeu foron as compañeiras, por suposto, porque son as mellores e todo o que a afección lle dá ao club, que é xenial”, conclúe a futbolista portuguesa.