VISTA ALEGRE ESTREA 2021 CON TELEDEPORTE NO DUELO DE IGUAIS ANTE PEÑÍSCOLA (LUNS 4, 20.00 HORAS)

Vista Alegre estreará 2021 diante das cámaras de Teledeporte; será mañá, luns 4, coa penúltima xornada da primeira volta de Primeira Masculina, no duelo de iguais ante Peñíscola Globeenergy FS (20.00 horas). “É un orgullo. Creo que é un recibimento perfecto para o Ano Novo é unha boa oportunidade para dar o mellor de nós e recuperar a vitoria” explicaba o capitán, Edu, antes dunha cita que tamén contará coa actualidade de Burela FS TV en previa e post. 

Ambas as escuadras chegan ao encontro con 16 puntos, coa duodécima praza para os castellonenses e a décimo cuarta para os mariñáns, nunha zona apertadísima. Tras dúas citas en branco, os pupilos de Juanma Marrube queren recibir o ano ao grande: “Agardamos unha cita moi igualada, como o reflicte a clasificación. Temos que facer valer a nosa vantaxe como locais para conseguir os tres puntos, temos que recuperar a fortaleza que nos custou nos últimos partidos aquí”, advertía o naronés, dun rival que chegará a Burela con ganas de cambiar a dinámica: “É un equipo que cambiou moito. Comezou moi ben, pero leva uns partidos baixos. Temos que xogar con esa ansiedade” explicaba Edu ante o equipo de Manuel Collado, que só puido puntuar a través do empate nas últimas oito xornadas, dende o triunfo na casa fronte ao Valdepeñas (1-3).

“O principal é a saúde. Oxalá as vacinas nos poidan devolver á normalidade axiña” así confesaba o meta naronés os seus desexos para 2021, buscando “lograr a salvación o antes posible para seguir medrando”. 

Os mariñáns remataron a preparación para a xornada 16 esta mañá en Vista Alegre. O conxunto castellonense tamén realizará a súa última sesión no mausoleo laranxa; será ás 18.00 horas. 

Convocatoria provisional Pescados Rubén Burela FS: 1. Edu, 2. Nito, 4. Lucho, 5. Iago Míguez, 6. Pitero, 7. Javi Rodríguez, 10. Matamoros, 12. Renato, 13. Giasson, 18. Quelle, 20. David Pazos, 22. Álex Diz, 23. Quintela, 24. M. Kaluza