Consulta aquí os horarios de base para esta semana, coas finais da Copa da Mariña en Biberóns e Prebenxamíns.

A Escola do Pescados Rubén Burela FS realizará xornadas de portas abertas a partir da vindeira semana para tod@s @s nen@s que queiran achegarse máis ao fútbol sala, entre as categorías Biberón e Cadete, e de forma totalmente gratuíta. O formulario de inscrición xa está dispoñible na sede do club. Poderán recibir toda a información na oficina laranxa (avenida Arcadio Pardiñas, número 97, entreplanta, Burela), a través do número 982581815 ou en escuelasburelafs@gmail.com Data límite de inscrición (prazas limitadas) -De Biberón (nad@s en 2013-14) a Benxamín: Ata o mércores 29 de maio (ás 14.00 horas) -De Alevín a Cadete: Ata o venres 7 de xuño (ás 14.00 horas) Períodos de adestramentos -De Biberón a Benxamín: Dende o xoves 30 de maio ata o martes 11 de xuño -De Alevín a Cadete: Dende o mércores 12 de xuño ata o martes 25 de xuño

Burela é o lugar elixido para albergar a XXV Edición da Copa de España Feminina de Fútbol Sala, que por primeira vez se denomina Copa de S.M. A Raíña. Esta fase final, que se disputará os días 14, 15 e 16 de xuño no pavillón de Vista Alegre, contará cos oito equipos mellor clasificados da liga regular da Primeira División Feminina de Fútbol Sala. A de 2019 converterase na terceira edición como anfitrioa para a vila mariñá. A competición arrincará o venres 14 de xuño, cos partidos de cuartos de final. O sábado 15 chegará o momento das dúas semifinais. Mentres que o partido decisivo será do domingo 16 de xuño. Unha vez que se confirmen os oito equipos clasificados, coñeceranse os emparellamentos e os cruces desta Copa de SM A Raíña. Neste caso, o primeiro na táboa enfrontarase ao oitavo, o segundo ao sétimo, o terceiro ao sexto, e cuarto e quinto veranse as caras.

O Pescados Rubén Burela FS continúa na fenda e pelexará polo título na última xornada grazas aos merecidos e sufridos tres puntos conseguidos hoxe ante UA Alacinte (3-2). Mariñás e levantinas ofreceron un grande espectáculo en Vista Alegre, nunha cita moi disputada e de gran despregamento físico, que se resolveu por goles na primeira parte e con hattrick de Bea Mateos. As burelistas non quixeron deixar nada ao azar; sentenciaron a primeira ocasión, no 1’22” de xogo, cun pase de Luci a Bea Mateos ao segundo pau. Máis tarde probaron Cami, por abaixo, e Cilene, de lonxe, cunha meta visitante moi atenta. As brasileiras protagonizaron pouco despois outra de ouro, con recuperación de Cilene e remate de Cami, que freou Jennifer ao bordo da área co corpo. No minuto 8 ampliaron distancias as locais, de novo nas zapatillas da capitá laranxa, nun centro de Cami; antes as alacantinas dispuxeran de dúas boas tentativas, de Mónica e Àngela desartelladas por Jozi e conseguiron recortar no 9 tras unha pugna na área mariñá, cazando o balón Elenita. A falta de catro minutos para o descanso o Pescados Rubén volveu ampliar a renda, co hattrick de Bea Mateos, en galopada pola banda. Con todo as visitantes aproveitaron unha perda para reducir de novo en menos dun minuto, con Àngela. Cami salvou o que podería ser o empate na recta final; tendo aínda tempo Dany de meteórica carreira cun disparo que se foi por pouco. Antes de cumprirse o minuto 2 do segundo acto, Luci puxo a proba por partida dobre a Jennifer. A meta visitante volveu frear as tentativas das pupilas de Julio Delgado e Lucas, no 25, sacando o pé ante Lara Balseiro. A Bea Mateos, no 29, fóiselle desviado o cuarto, tras un brillante recorte da sempre máxica Cilene. Precisamente, a 6 burelista protagonizou un mísil segundos despois, que despexou de novo a meta visitante. Jozi estivo moi atenta ante as mellores da UA, no 37, que rozou o empate con ocasións de Mónica, Carmen e Ana María. Àngela, sobre a bucina, intentou sorprender á meta brasileira, que salvou coas mans por arriba. Ficha técnica Pescados Rubén Burela FS: Jozi, Dany, Cami, Bea Mateos, Luci, cinco inicial; tamén xogaron Cilene, Lara Balseiro, Jenny, Popó, Cristina UA Alicante FSF: Jennifer, Ana María, Elenita, Lara Terrés, Ángela Míngot, cinco inicial; tamén xogaron Carmen, Mónica, Raquel Goles: 1-0, minuto 2, Bea Mateos; 2-0, minuto 8, Bea Mateos; 2-1, minuto 9, Elenita; 3-1, minuto 16, Bea Mateos; 3-2, minuto 17, Àngela Árbitros: Vilas López // Cardero Rodríguez (Galicia). Por Burela amarela a Dany (minuto 6), Jenny (minuto 15). Incidencias: Partido correspondente á xornada 29 de Primeira RFEF disputado en Vista Alegre ante unhas 400 persoas, coa publicación de terceiro número da Gaceta Laranxa. Peque recibiu o Trofeo Sandoz á Mellor Xogadora 2018-19 de mans do xerente de Kessarys Joyeros, Jorge Orosa, e do presidente laranxa, Manuel Blanco