O Pescados Rubén Burela FS festexará o Martes de Entroido coas semifinais de Copa Galicia por partida dobre, na casa ante O Parrulo e a domiclio con Viaxes Amarelle. Vista Alegre acollerá o encontro de ida da edición XXIX masculina coa visita dos ferroláns (20.30 horas) e entrada totalmente gratuíta. Pola mañá será a quenda da XIV feminina, co desprazamento á pista coruñesa do Sagrada Familia (12.00 horas). O resto dos protagonistas da fase tamén se medirán o día 25: COPA MASCULINA. Santiago Futsal- Noia Portus Apostoli (21.00 horas) COPA FEMININA. Poio Pescamar FSF-Ourense Envialia (20.00 horas) O partido de volta está previsto para o 18 de marzo. Os vencedores pelexarán polo título o 11 de abril, na final.

O Pescados Rubén Burela FS non puido comezar esta segunda semana de dobre esixencia puntuando. A escuadra laranxa, coa retirada de Matamoros nos compases iniciais por molestias nun xemelgo, non puido facer fronte á revelación da tempada, Viña Albali Valdepeñas (4-1), que conseguiu tomar vantaxe no marcador grazas á estratexia cun tanto temperán en cada parte e despois atopar oportunidades fronte ao xogo de cinco dos galegos. Nova oportunidade: Os mariñáns continuarán coa súa xira semanal poñendo rumbo esta noite xa a Peñíscola, onde disputarán a xornada 22 o venres, a partir das 21.00 horas. O ex dos laranxas Chino deulles a vantaxe aos locais nada máis saltar á pista, no minuto 3, aproveitando un saque rápido de esquina. Comezou entón a costa arriba para os galegos; antes da medianía do primeiro acto Pope e Joselito dispuxeron das mellores visitantes chocando primeira fronte ao Edu de Valdepeñas e máis tarde con P. Ibarra. O meta naronés mantivo aos de Juanma Marrube no partido con dúas grandes intervencións ante Cainan e Chino nos minutos 14 e 15. Rozando o descanso Xande non puido aproveitar a ocasión para empatar en dobre penalti. Rafael Rato ampliou as distancias no regreso á pista, sentenciando de novo desde un saque de córner. No 27, o Pescados Rubén Burela apostou por xogo de cinco con Joselito. Non houbo fortuna e no 31 o meta local subiu o 3-0. O porteiro xogador foi o baluarte dos mariñáns, que conseguiron reducir distancias no 39, con Álex Diz, aínda que Rafa Rato volveu recuperar a vantaxe nos últimos compases, co definitivo 4-1. Ficha técnica Viña Albali Valdepeñas FS: Edu, M. García, P. Ibarra, Nano, Cainan, cinco inicial; tamén xogaron Catela, Jose Ruiz, Rafael Rato, Chino, Dani Santos, Juanan Pescados Rubén Burela FS: Edu, Lucho, Matamoros, Renato, Álex Diz, cinco inicial; tamén xogaron Luisma, Pitero, Joselito, Pope, Pixote, Xande Goles: 1-0, minuto 3, Chino; 2-0, minuto 23, Rafa Rato; 3-0, minuto 31, Edu; 3-1, minuto 39, Álex Diz; 4-1, minuto 40, Rafa Rato Árbitros: García Hernández // Redondo Arenales. Por Burela amarela a Renato (minuto 20), Xande (minuto 34), Lucho (minuto 38) Incidencias: Partido correspondente á xornada 20 de Primeira División disputado no Virgen de la Cabeza de Valdepeñas.

O Pescados Rubén Burela FS continúa sen tregua o seu camiño nun calendario de máxima esixencia. Tras Copa do Rei e liga ante ElPozo e en menos de sete días, Valdepeñas será a terceira cita para os de Juanma Marrube noutra semana de dobre compromiso, en liga. Mañá o Virgen de la Cabeza acollerá a xornada 20 (aprazada do día 8) a partir das 21.00 horas. Os laranxas terán que pelexar para sacar algo positivo na pista do gran descubrimento da tempada, que custodia a terceira praza (41 puntos) e que ademais esperará os galegos con moitas ganas de desquitarse ante a derrota do sábado na casa de Industrias Santa Coloma (8-3), rompendo a racha 11 xornadas sen perder. Tan só Levante (3-6, xornada 8) lle impediu puntuar como local e arrebatáronlle puntos Aspil (2-2, xornada 2), Santa Coloma (2-2, xornada 6) e Palma (xornada 18). “Sabemos que vai ser un partido moi esixente; é sen dúbida o equipo revelación desta liga. Está facendo moi ben as cousas, mostrándose regular tanto na casa coma a domicilio. Tras o último tropezo terán moitas ganas de recuperar sensacións” advertía unha das Xoias Laranxas, Pitero, que puido dispoñer de minutos ante ElPozo en Vista Alegre logo de estar ausente nun par de encontros por unha lesión no cuádriceps. Na ida, os castelano-manchegos apropiáronse dos puntos, con 1-4. “Temos que aprender dos erros que cometemos na ida. Temos que saír a por todas, mantendo a concentración e a intensidade. En Vista Alegre disputamos unha primeira parte igualada, pero tras o descanso faltounos claridade de ideas. Chegamos nun momento de bo xogo no que só nos está faltando un pouquiño” reflexionaba o 9 laranxa. A expedición de Juanma Marrube, formada por 13 xogadores e xa en Valdepeñas, realizará dobre sesión de adestramento, hoxe ás 21.00 horas e mañá ás 11.30 horas. Expedición Pescados Rubén Burela FS: 1. Edu, 2. Joselito, 4. Lucho, 6. Luisma, 9. Pitero, 10. Matamoros, 12. Renato, 13. Pixote, 14. Pope, 15. Xande, 16. Eto'ou, 22. Álex Diz, 24. M. Kaluza Rumbo a Peñíscola. Ao finalizar o encontro, os mariñáns continuarán o seu periplo lonxe de Galicia, con rumbo a Peñíscola, para medirse o venres (21.00 horas) ao cadro do ex-burelista Juanlu Alonso na xornada 22.

O gran traballo de Galicia Sub-19 e das Xoias Laranxas non puido gañar o billete para a loita definitiva polo Campionato de Seleccións Autonómicas disputado esta fin de semana en Las Rozas. A Irmandiña, con Jorge Quelle, Renato Rodrigues -con gol- e Bruno García, caeu na semifinal ante o campión, Madrid (5-3), que se alzou co título con 5-1 sobre Andalucía. Ligazón FUTGAL Galicia Sub-16, pola súa banda, quedou subcampioa, tras sucumbir nos penaltis ante Baleares (1-1).