Vuelta a la pista, con Majadahonda para estrenar la segunda vuelta

Despois do descanso ligueiro pola fase previa do Nacional Sub-21 de Seleccións Autonómicas, o Pescados Rubén Burela FS volve á pista mañá en Majadahonda para estrear a segunda volta con boas sensacións (La Granadilla, 20.00 horas). “Vimos dun parón e creo que hai que cambiar a mentalidade. Empezar de cero e a ver se a segunda volta se nos dá mellor”, explicaba a capitá Bea Mateos, tras o tropezo en Alcorcón (6-1).

A 14 burelista fai un bo balance neste ecuador ligueiro, coa terceira praza (34 puntos), aínda que con marxe de evolución, sobre todo a domicilio, con máis concentración e traballo e, sobre todo, co obxectivo inmediato de romper os malos números de Madrid: “Acabamos nunha boa praza a primeira volta, pero creo que este equipo ten que dar moito máis; ten que ter máis sacrificio, compromiso e paixón. Cada vez que imos a Madrid vimos cun mal resultado pero creo que non deixa de ser froito da casualidade. Temos que cambiar en moitos aspectos; temos que saír máis concentradas, a polo partido desde o minuto 1 e dar moitísimo máis do que vimos dando”.

O reto será na casa do Majadahonda Afar4 FSF, undécimo (17 puntos), que pechou a primeira volta con vitoria fronte a Leganés (3-2): “Vai ser un partido moi igualado. Xa nos demostraron aquí que pelexan moitísimo e na súa casa máis aínda, onde a todos os equipos lles custa moito gañar, e creo que vai ser un partido moi disputado”, explicaba a salmantina, co recordo de 6-5 en Vista Alegre.

“Creo que este é un equipo feito para gañar, non se reflectiu nalgúns momentos e temos que seguir traballando, sobre todo na defensa e non sufrir tanto nos partidos. Estamos en Burela e non podemos dar nada por perdido; imos loitar por todas as competicións” puntualizaba Bea Mateos con optimismo ante toda a segunda volta por diante.

A expedición partirá mañá sobre as 9.30 horas, sen Sofía, por lesión, nin Sara Correia, por enfermidade.

Convocatoria Pescados Rubén Burela FS: 1. Jozi, 3. Dany, 6. Cilene, 8. Cami, 10. Lara, 12. Ana Romero, 14. Bea Mateos, 15. Judith, 16. Tai, 37. Julia Forsiuk

Vista Alegre, sede do Campionato de España Sub-17 Feminino

A próxima semana Vista Alegre abrirá as súas portas como sede do Campionato de España de Seleccións Sub-17 Feminino, entre o 7 e o 11 de febreiro, compartindo escenario tamén na Mariña os pavillóns de Viveiro e Foz. As instalacións burelesas terán unha semana moi atarefada, co espectáculo engadido de Tarde Laranxa o sábado 10, en Primeira RFEF Pescados Rubén Burela FS-UA Alicante (16.30 horas) e Segunda LNFS Pescados Rubén Burela FS-Prone Lugo (19.00 horas).